വിമാന ടിക്കറ്റ് നിരക്കിൽ ഇനി ഇന്ധന ചാർജ് ഈടാക്കില്ല; ഇൻഡിഗോ എയർലൈൻസ്
Sunday, January 7, 2024 5:09 PM IST
ന്യൂഡൽഹി: ഡൽഹി, മുംബൈ, കേരളത്തിലെ ചില വിമാനത്താവളങ്ങൾ എന്നിവിടങ്ങളിലേയ്ക്ക് ഇനി ഇൻഡിഗോ വിമാനങ്ങളിൽ ടിക്കറ്റ് നിരക്ക് കുറയും. ഇന്ധന ചാർജ് ടിക്കറ്റ് നിരക്കിൽനിന്ന് ഇൻഡിഗോ ഒഴിവാക്കാൻ തീരുമാനിച്ചതോടെയാണ് ഈ കുറവ്. 4 ശതമാനം വരെ നിരക്കിൽ ഇനി കുറവുലഭിക്കും.
ഏവിയേഷൻ ടർബൈൻ ഇന്ധനത്തിന്റെ വില കുറഞ്ഞതോടെയാണ് യാത്രക്കാർക്കും ഇളവ് നൽകാൻ ഇൻഡിഗോ തീരുമാനിച്ചത്. 2023 ഒക്ടോബറിൽ ഏവിയേഷൻ ടർബൈൻ ഫ്യുവലിന്റെ വില വർധിച്ചതിനെ തുടർന്ന് വിമാന ടിക്കറ്റ് ചാർജിലും വർധന ഏർപ്പെടുത്തിയിരുന്നു.
എന്നാൽ, ഇന്ധന വിലയിൽ ഇനിയും മാറ്റമുണ്ടാകാൻ സാധ്യതയുള്ളതിനാൽ ഇതിനനുസരിച്ച് ടിക്കറ്റ് നിരക്കിൽ മാറ്റമുണ്ടായേക്കാമെന്നും ഇൻഡിഗോ അറിയിച്ചു.