പോപ്പുലര്‍ ഫ്രണ്ട് കേന്ദ്രത്തില്‍നിന്ന് പിടികൂടിയവര്‍ക്ക് തീവ്രവാദി ബന്ധം
Wednesday, April 24, 2013 9:03 AM IST
കണ്ണൂര്‍: നാറാത്ത് റെയിഡില്‍ അറസ്റ്റിലായ പോപ്പുലര്‍ ഫ്രണ്ട് പ്രവര്‍ത്തകര്‍ക്ക് തീവ്രവാദി ബന്ധമുണ്െടന്ന് പോലീസ്. ഇവരില്‍നിന്ന് വിദേശ കറന്‍സികളും തിരിച്ചറിയല്‍ കാര്‍ഡുകളും പിടിച്ചെടുത്തു. പോപ്പുലര്‍ ഫ്രണ്ടിന്റെയും എസ്ഡിപിഐയുടെയും ലഘുലേഖകളും റെയ്ഡില്‍ പിടിച്ചെടുത്തിട്ടുണ്ട്. തീവ്രവാദി ബന്ധമുണ്െടന്ന് വ്യക്തമായതോടെ കേസ് എന്‍ഐഎയ്ക്ക് വിടാന്‍ തീരുമാനിച്ചിട്ടുണ്ട്. ഉന്നത ഉദ്യോഗസ്ഥര്‍ സ്ഥലത്തെത്തി ചോദ്യം ചെയ്യും..

സംഭവത്തെക്കുറിച്ച് വിശദമായ അന്വേഷണം നടത്തുകയാണെന്ന് സ്ഥലം സന്ദര്‍ശിച്ച ഉത്തര മേഖല എഡിജിപി ശങ്കര്‍ റെഡ്ഡി വ്യക്തമാക്കി. പോലീസിന്റെ പ്രാഥമിക അന്വേഷണത്തിനു ശേഷം ആവശ്യമെങ്കില്‍ കേസ് മറ്റ് ഏജന്‍സികളെ ഏല്‍പ്പിക്കുന്നതിനെക്കുറിച്ച് തീരുമാനമെടുക്കും. മാരകായുധങ്ങള്‍ പിടിച്ചെടുത്തത് അതീവ ഗൌരവമുള്ള സംഭവമാണെന്നും അദ്ദേഹം പറഞ്ഞു. ഇന്ന് രാവിലെ അദ്ദേഹം ക്യാമ്പ് നടന്ന പ്രദേശം സന്ദര്‍ശിച്ചു. അന്വേഷണ ഉദ്യോഗസ്ഥരുമായി വിശദമായ ചര്‍ച്ച നടത്തിയതിനു ശേഷമായിരുന്നു അദ്ദേഹത്തിന്റെ പ്രതികരണം.

അറസ്റ്റിലായവരുടെ ഫോണ്‍ കോളുകള്‍ പരിശോധിച്ചാണ് ഇത്തരമൊരു നിഗമനത്തില്‍ പോലീസ് എത്തിയത്. അറസ്റ്റിലായ പ്രധാനികളില്‍ ഒരാളായ അബ്ദുള്‍ അസീസിന് വിദേശത്തുനിന്ന് ഫോണ്‍ കോളുകളും പണവും എത്തിയതായി പോലീസിന് വിവരം ലഭിച്ചിട്ടുണ്ട്. അസീസ് എട്ട് വര്‍ഷം മുമ്പ് ഹിന്ദു ഐക്യവേദി ജില്ലാ സെക്രട്ടറി അശ്വിനികുമാറിനെ ബസില്‍ വെട്ടിക്കൊലപ്പെടുത്തിയ കേസിലെ പ്രതിയാണെന്ന് പോലീസ് പറഞ്ഞു. സി.പി.എം പ്രവര്‍ത്തകനെ കൊലപ്പെടുത്താന്‍ ശ്രമിച്ച കേസിലെ പ്രതിയാണ് ഫഹദ്.


രഹസ്യ വിവരത്തെ തുടര്‍ന്നാണ് പോപ്പുലര്‍ ഫ്രണ്ടിന്റെ ആയുധ പരിശീലന കേന്ദ്രത്തില്‍ പോലീസ് റെയിഡില്‍ മാരകായുധങ്ങള്‍ പിടിച്ചെടുത്തു. രഹസ്യ വിവരത്തെ തുടര്‍ന്നാണ് ജില്ല പൊലീസ് മേധാവികളുടെ നേതൃത്വത്തിലുള്ള വന്‍ സംഘം കണ്ണൂര്‍ നാറാത്തുള്ള കേന്ദ്രം വളഞ്ഞത്. വാളുകള്‍, ബോംബുകള്‍ വെടിമരുന്ന് തുടങ്ങിയവ പിടിച്ചെടുത്തിരുന്നു. .

ബോംബുകള്‍ക്കും ആയുധങ്ങള്‍ക്കും പുറമേ നിരവിധി ദേശ വിരുദ്ധ ലഘുലേഖകളും, ഇറാന്‍ പൌരന്മാരുടെ അടക്കമുള്ള തിരിച്ചറിയല്‍ കാര്‍ഡുകളും ഇവിടുന്ന് പിടിച്ചെടുത്തിരുന്നു. ഇതുമായി ബന്ധപ്പെട്ട് 21 പേരെയാണ് കസ്റഡിയില്‍ എടുത്തിരുന്നത്. അന്യ സംസ്ഥാനങ്ങളില്‍നിന്നുവരെ നിരവധിപേര്‍ ഇവിടെ വന്ന് പരിശീലനം നേടിയതായി പൊലീസ് പറഞ്ഞു. ഒഴിഞ്ഞ പറമ്പിലാണ് ഈ കേന്ദ്രം സ്ഥിതിചെയ്തിരുന്നത്. .

ആയുധ പരിശീലന വിവരം ലഭിച്ചതിനെത്തുടര്‍ന്നാണ് എ.എസ്.പി യതീഷ് ചന്ദ്ര, കണ്ണൂര്‍ ഡിവൈ.എസ്.പി പി.സുകുമാരന്‍, ഡെപ്യൂട്ടി കമ്മിഷണര്‍ കെ.ബി.വേണുഗോപാല്‍ എന്നിവരുടെ നേതൃത്വത്തില്‍ ഇന്നലെ രാവിലെ റെയ്ഡ് ചെയ്തത്. ക്ളാസില്‍ അമ്പതോളം പേരുണ്ടായിരുന്നു. പോലീസ് കെട്ടിടം വളഞ്ഞപ്പോള്‍ പലരും ഓടി രക്ഷപ്പെട്ടു. പിടിയിലായവരില്‍ പ്രദേശവാസി ഒരാള്‍ മാത്രമാണ്.