യുപിയിലെ മുഴുവൻ സീറ്റിലും ബിജെപി ജയിക്കും: രാജ്നാഥ് സിംഗ് : Deepika.com National News |

Click here for detailed news of all items

യുപിയിലെ മുഴുവൻ സീറ്റിലും ബിജെപി ജയിക്കും: രാജ്നാഥ് സിംഗ്

Wednesday, May 1, 2024 1:34 AM IST

ന്യൂഡൽഹി: ഉത്തർപ്രദേശിലെ മുഴുവൻ ലോക്സഭാ സീറ്റുകളിലും ബിജെപി വിജയിക്കുമെന്ന് പ്രതിരോധമന്ത്രി രാജ്നാഥ് സിംഗ്. ആദ്യ രണ്ടു ഘട്ടങ്ങളിൽ വോട്ടെടുപ്പ് പൂർത്തിയാക്കിയ 16 മണ്ഡലങ്ങളിലും പോളിംഗ് ശതമാനം കുറഞ്ഞതിൽ പാർട്ടിക്ക് ആശങ്കയില്ലെന്നും സിംഗ് പറഞ്ഞു.

പ്രതിപക്ഷ പാർട്ടിയിലെ വോട്ടർമാർക്ക് വോട്ട് ചെയ്യാൻ താത്പര്യമില്ലാത്തതിനാലാണ് വോട്ടിംഗ് ശതമാനം കുറഞ്ഞത്. പ്രതിപക്ഷ പാർട്ടികൾ അവ്യക്തതയുടെ രാഷ്‌ട്രീയമാണ് കളിക്കുന്നതെന്നും അദ്ദേഹം കൂട്ടിച്ചേർത്തു.

പ്രധാനമന്ത്രി നരേന്ദ്ര മോദിയുടെ ജനപ്രീതി സമാനതകളില്ലാത്തതാണ്. അദ്ദേഹം ഇന്ത്യയുടെ കീർത്തി ഉയർത്തി. രാജ്യം അദ്ദേഹത്തെ വീണ്ടും പ്രധാനമന്ത്രിയാക്കാൻ ആഗ്രഹിക്കുന്നു. ജനങ്ങൾ മോദിയെ വിശ്വസിക്കുന്നു. യുപിയിലെ എണ്‍പതു സീറ്റിലും ബിജെപി വിജയിക്കും- പ്രതിരോധമന്ത്രി പറഞ്ഞു.

രാഹുൽ ഗാന്ധിയും പ്രിയങ്ക ഗാന്ധിയും അമേഠിയിലും റായ്ബറേലിയിലും മത്സരിക്കുന്നതു സംബന്ധിച്ച ചോദ്യത്തിന്, പോരാട്ടത്തിനായി അവരെ ക്ഷണിക്കുന്നു. സ്ഥാനാർഥി പ്രഖ്യാപനത്തിന് എന്തിനു വൈകുന്നു എന്ന് അദ്ദേഹം പ്രതികരിച്ചു.

ബിജെപി മോദിയുടെ നേതൃത്വത്തിൽ വൻ ഭൂരിപക്ഷത്തോടെ അധികാരത്തിലെത്തും. വോട്ടിംഗ് ശതമാനം കുറഞ്ഞത് പ്രതിപക്ഷത്തെയാണ് ബാധിക്കുക. രാജ്യത്ത് ഭരണവിരുദ്ധ വികാരം ഇല്ല. അരവിന്ദ് കേജരിവാളിനെ അറസ്റ്റ് ചെയ്തത് അദ്ദേഹം തെറ്റു ചെയ്തതുകൊണ്ടാണ്.

ഏജൻസികൾ ചെയ്തതു തെറ്റാണെങ്കിൽ കോടതിയെ സമീപിക്കണം- സിംഗ് വ്യക്തമാക്കി.
ലോക്സഭാ തെരഞ്ഞെടുപ്പ് അഞ്ചാം ഘട്ടത്തിൽ 20ന് രാജ്നാഥ് സിംഗ് ലക്നോവിൽനിന്ന് ജനവിധി തേടും.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.