കങ്കണ റണൗട്ടിനെതിരേ വിവാദ പരാമർശം ;നടപടിയെടുക്കണമെന്നു വനിതാ കമ്മീഷൻ : Deepika.com National News |

ന്യൂഡൽഹി: നടിയും ബിജെപി സ്ഥാനാർഥിയുമായ കങ്കണ റണൗട്ടിനെതിരേ സമൂഹമാധ്യമത്തിൽ അപകീർത്തികരമായ പോസ്റ്റ് പങ്കുവച്ചതിൽ നടപടി ആവശ്യപ്പെട്ട് ദേശീയ വനിതാ കമ്മീഷൻ.

കോണ്‍ഗ്രസ് നേതാക്കളായ സുപ്രിയ ശ്രീനേത്, എച്ച്. എസ്. ആഹിർ എന്നിവരാണ് അപകീർത്തിപരമായ പോസ്റ്റ് പങ്കുവച്ചത്. ഇവർക്കെതിരേ കർശന നടപടി സ്വീകരിക്കണമെന്നാവശ്യപ്പെട്ട് വനിതാ കമ്മീഷൻ തെരഞ്ഞെടുപ്പ് കമ്മീഷണർക്ക് കത്തയച്ചു.

കങ്കണയുടെ ചിത്രത്തോടൊപ്പമാണ് ഇവരെ അധിക്ഷേപിക്കും വിധം ഇൻസ്റ്റഗ്രാമിൽ സുപ്രിയ പോസ്റ്റിട്ടത്.

ഇതിനു മറുപടിയുമായി കങ്കണ രംഗത്തെത്തുകയും ചെയ്തിരുന്നു. താൻ സിനിമയിൽ പലതരത്തിലുള്ള സ്ത്രീകഥാപാത്രങ്ങളെ അവതരിപ്പിച്ചിട്ടുണ്ടെന്നും എല്ലാ സ്ത്രീകൾക്കും ബഹുമാനത്തിന് അർഹതയുണ്ടെന്നുമായിരുന്നു കങ്കണയുടെ പ്രതികരണം.

ഗുജറാത്തിലെ കോണ്‍ഗ്രസ് നേതാവായ എച്ച്.എസ്. ആഹിർ എക്സിൽ പങ്കുവച്ച പോസ്റ്റിനെതിരേയും കങ്കണ രൂക്ഷമായി പ്രതികരിച്ചു. എന്നാൽ തങ്ങളുടെ അറിവോടെയല്ല പോസ്റ്റ് പങ്കുവച്ചതെന്നാണ് കോണ്‍ഗ്രസ് നേതാക്കളുടെ പ്രതികരണം.

ബിജെപിയുടെ അഞ്ചാം സ്ഥാനാർഥി പട്ടികയിൽ ഇടം പിടിച്ച കങ്കണ ഹിമാചൽപ്രദേശിലെ മാണ്ഡിയിൽനിന്നാണ് മത്സരിക്കുന്നത്.