ഉർജിത് പട്ടേൽ ചുമതലയേൽക്കുന്നതിനു മുന്പുതന്നെ പുതിയ നോട്ടിൽ ഒപ്പിട്ടു : Deepika.com National News |

Click here for detailed news of all items

ഉർജിത് പട്ടേൽ ചുമതലയേൽക്കുന്നതിനു മുന്പുതന്നെ പുതിയ നോട്ടിൽ ഒപ്പിട്ടു

Friday, February 17, 2017 2:45 PM IST

ന്യൂഡൽഹി: റിസർവ് ബാങ്ക് ഗവർണറായി ഉർജിത് പട്ടേൽ ചുമതലയേൽക്കുന്നതിനു മുന്പുതന്നെ അദ്ദേഹത്തിന്‍റെ ഒപ്പോടു കൂടിയ രണ്ടായിരം രൂപ നോട്ടിന്‍റെ അച്ചടി തുടങ്ങിയിരുന്നതായി റിപ്പോർട്ടുകൾ.

രഘുറാം രാജൻ ചുമതലയൊഴിയുന്നതിനു മുന്പുതന്നെ 2000 രൂപയുടെ അച്ചടി തുടങ്ങിയിരുന്നതാണെന്നും അവയിൽ ഉർജിത് പട്ടേലിന്‍റെ ഒപ്പുകളാണ് അച്ചടിച്ചിരുന്നതെന്നും ഹിന്ദുസ്ഥാൻ ടൈംസ് റിപ്പോർട്ട് ചെയ്യുന്നു. എന്നാൽ, ഇതു സംബന്ധിച്ച ചോദ്യങ്ങൾക്ക് ഉത്തരം നൽകാൻ കേന്ദ്ര ധനമന്ത്രാലയവും റിസർവ് ബാങ്കും തയാറായിട്ടില്ല.

കഴിഞ്ഞ ഓഗസ്റ്റ് 22നാണ് രണ്ടായിരത്തിന്‍റെ പുതിയ കറൻസി അച്ചടിക്കാൻ തുടങ്ങിയത്. ഈ സമയത്ത് രഘുറാം രാജനായിരുന്നു റിസർവ് ബാങ്ക് ഗവർണർ. ഈ സമയത്ത് ഉർജിത് പട്ടേലിന്‍റെ പേര് അടുത്ത ഗവർണറായി പ്രഖ്യാപിച്ചിരുന്നെന്നും രണ്ടാഴ്ചയ്ക്കുശേഷം സെപ്റ്റംബർ നാലിനാണ് പട്ടേൽ ചുമതലയേറ്റതെന്നും രേഖകൾ വ്യക്തമാക്കുന്നു. എന്നാൽ, ഉർജിത് പട്ടേലിന്‍റെ പേര് പ്രഖ്യാപിച്ചതിനൊപ്പം തന്നെ അച്ചടി തുടങ്ങിയ പുതിയ നോട്ടുകളിലും അദ്ദേഹത്തിന്‍റെ ഒപ്പുകൾ ഉൾപ്പെടുത്തുകയായിരുന്നെന്ന് റിപ്പോർട്ട് ചൂണ്ടിക്കാട്ടുന്നു.

അതേസമയം, ഇതു സംബന്ധിച്ച് വിവരാവകാശ നിയമ പ്രകാരം ഉന്നയിച്ച ചോദ്യത്തിനു മറുപടി നൽകാൻ കേന്ദ്ര ധനമന്ത്രാലയവും റിസർവ് ബാങ്കും തയാറായില്ല. പുതിയ രണ്ടായിരം രൂപ നോട്ട് പുറത്തിറക്കുന്ന തീരുമാനത്തിന് രഘുറാം രാജന്‍റെ പിന്തുണ ഉണ്ടായിരുന്നോ, എന്തുകൊണ്ടാണ് പുതിയ നോട്ടിൽ അദ്ദേഹത്തിന്‍റെ ഒപ്പ് ഇല്ലാത്തത് എന്നീ ചോദ്യങ്ങളാണ് ഹിന്ദുസ്ഥാൻ ടൈസ് ചോദിച്ചത്. രണ്ടായിരത്തിന്‍റെ നോട്ടുകൾ അച്ചടിക്കാനുള്ള അംഗീകാരം ജൂണ്‍ ഏഴിനു ലഭിച്ചു എന്നും ഉടൻ തന്നെ പുതിയ നോട്ട് അച്ചടിക്കാനുള്ള നടപടികൾ തുടങ്ങിയെന്നും റിസർവ് ബാങ്ക് പാർലമെന്‍റിന്‍റെ ധനകാര്യ സമിതിയെ അറിയിച്ചിരുന്നു. പുതിയ 500 രൂപ നോട്ടുകൾ അച്ചടിക്കാനുളള നിർദേശം നൽകിയത് നവംബർ 23 നാണെന്നു വിവരാവകാശ നിയമ പ്രകാരമുള്ള മറുപടിയിൽ റിസർവ് ബാങ്ക് അറിയിക്കുകയും ചെയ്തു.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.