സഹകരണ സംഘങ്ങൾക്കു നിയന്ത്രണം: കേന്ദ്രത്തിനും റിസർവ് ബാങ്കിനും നോട്ടീസ് : Deepika.com National News |

ന്യൂഡൽഹി: നോട്ട് നിരോധനവുമായി ബന്ധപ്പെട്ട് പ്രാഥമിക സഹകരണ സംഘങ്ങൾക്കു നിയന്ത്രണം ഏർപ്പെടുത്തിയതിനെതിരേയുള്ള ഹർജിയിൽ സുപ്രീംകോടതി കേന്ദ്രസർക്കാരിനും റിസർവ് ബാങ്ക് ഓഫ് ഇന്ത്യക്കും നോട്ടീസയച്ചു. സാധാരണ വ്യക്തികൾക്കു സമാനമായ നിയന്ത്രണങ്ങൾ സഹകരണ സംഘങ്ങൾക്കും ഏർപ്പെടുത്തിയ റിസർവ് ബാങ്ക് നടപടിക്കെതിരേ പാപ്പിനിശേരി സഹകരണ ബാങ്ക് അടക്കമുള്ളവരാണ് സുപ്രീം കോടതിയെ സമീപിച്ചത്.

ആയിരക്കണക്കിന് അംഗങ്ങളുള്ള സഹകരണ സംഘങ്ങൾക്ക് അഞ്ചു ലക്ഷം രൂപ മാത്രം പിൻവലിക്കുന്നതിനു പരിധി ഏർപ്പെടുത്തിയതിനെയും സഹകരണ സംഘങ്ങളെ റിസർവ് ബാങ്ക് നിയന്ത്രിക്കുന്നതിനെതിരേയുമാണ് പാപ്പിനിശേരി, മാടായി, മറവൻചേരി സഹകരണ സംഘങ്ങൾ ഹർജി നൽകിയത്.

സംസ്ഥാന രജിസ്ട്രാറിന്‍റെ അധികാര പരിധിയിലുള്ള പ്രാഥമിക സഹകരണ സംഘങ്ങൾക്കു റിസർവ് ബാങ്ക് നിയന്ത്രണങ്ങൾ ഏർപ്പെടുത്താനാവില്ലെന്ന് ചീഫ് ജസ്റ്റീസ് ജെ.എസ്. ഖെഹർ അധ്യക്ഷനായ ബെഞ്ചിനു മുന്പാകെ സഹകരണ സംഘങ്ങൾക്കുവേണ്ടി ഹാജരായ അഭിഭാഷകൻ തന്പാൻ വർഗീസ് ചൂണ്ടിക്കാട്ടി. ഇതു പരിഗണിച്ച കോടതി, ഇക്കാര്യത്തിൽ വിശദീകരണം ആവശ്യപ്പെട്ട് കേന്ദ്ര സർക്കാരിനും റിസർവ് ബാങ്കിനും നോട്ടീസയയ്ക്കാൻ നിർദേശിക്കുകയായിരുന്നു.