"കുടിയിറക്കില്ല'; മുനമ്പംകാർക്ക് മുഖ്യമന്ത്രിയുടെ ഉറപ്പ്
Sunday, November 24, 2024 1:23 AM IST
കൊച്ചി: വഖഫ് അവകാശവാദം ഉയര്‍ന്ന മുനമ്പത്ത് നിലവിലെ താമസക്കാരില്‍ ഒരാളെയും കുടിയിറക്കില്ലെന്നു മുഖ്യമന്ത്രി. ഭൂപ്രശ്‌നത്തിന് ശാശ്വതമായി പരിഹാരം കാണാനാണു സര്‍ക്കാര്‍ ശ്രമിക്കുന്നതെന്നും മുനമ്പം ഭൂസംരക്ഷണസമിതി പ്രതിനിധികളുമായി നടത്തിയ ഓണ്‍ലൈന്‍ ചര്‍ച്ചയില്‍ മുഖ്യമന്ത്രി വ്യക്തമാക്കി.
താമസക്കാര്‍ക്ക് ബുദ്ധിമുട്ട് ഉണ്ടാക്കാതെ പ്രശ്‌നം പരിഹരിക്കാനാണ് സര്‍ക്കാര്‍ ഉദ്ദേശിക്കുന്നത്. രേഖകള്‍ ഉള്ള ഒരാളെപ്പോലും കുടിയൊഴിപ്പിക്കില്ല. ഇക്കാര്യങ്ങള്‍ ഉറപ്പാക്കുന്നതിന്‍റെ ഭാഗമായാണു ഹൈക്കോടതി മുന്‍ ആക്ടിംഗ് ചീഫ് ജസ്റ്റീസ് സി.എന്‍. രാമചന്ദ്രന്‍ നായരെ ജുഡീഷല്‍ കമ്മീഷനായി നിയോഗിച്ചിട്ടുള്ളത്. താമസക്കാരുടെ ആവലാതികള്‍ കമ്മീഷന്‍ മുമ്പാകെ കൃത്യമായി ബോധിപ്പിക്കാനുള്ള അവസരമുണ്ടാകും.
നോട്ടീസ് നൽകുന്നത് അടക്കമുള്ള നടപടികളൊന്നും വഖഫ് ബോര്‍ഡ് നടത്തില്ല. കോടതിയിലുള്ള കേസില്‍ സര്‍ക്കാര്‍ നിലപാട് അറിയിക്കും. നിലവിലെ താമസക്കാരുടെ അവകാശങ്ങള്‍ എന്തു വില കൊടുത്തും സംരക്ഷിക്കണമെന്ന നിലപാടാണു സര്‍ക്കാരിനുള്ളത്. ഹൈക്കോടതി മുമ്പാകെ ഈ വിഷയത്തില്‍ നിലവിലുള്ള കേസുകളില്‍ താമസക്കാര്‍ക്ക് അനുകൂലമായി സര്‍ക്കാര്‍ കക്ഷി ചേരും.
നികുതി അടയ്ക്കുന്നത് തടഞ്ഞുകൊണ്ടുള്ള നിലവിലെ ഹൈക്കോടതിയുടെ സ്റ്റേ നീക്കിക്കിട്ടാനുള്ള സാധ്യമായ നടപടികളും സര്‍ക്കാര്‍ സ്വീകരിക്കും. ജനങ്ങളുടെ ആശങ്കകള്‍ കോടതിയെ ബോധ്യപ്പെടുത്തും. കമ്മീഷന്‍റെ പ്രവര്‍ത്തനം വേഗത്തിലാക്കാന്‍ താമസക്കാർ സഹകരിക്കണമെന്നും മുഖ്യമന്ത്രി ചര്‍ച്ചയില്‍ അഭ്യര്‍ഥിച്ചു.
മന്ത്രിമാരായ കെ. രാജന്‍, പി. രാജീവ്, വി. അബ്‌ദുറഹ്‌മാന്‍, ചീഫ് സെക്രട്ടറി ശാരദ മുരളീധരന്‍, എറണാകുളം ജില്ലാ കളക്ടര്‍ എന്‍.എസ്.കെ. ഉമേഷ്, കെ.എന്‍. ഉണ്ണിക്കൃഷ്ണന്‍ എംഎല്‍എ, വരാപ്പുഴ ആര്‍ച്ച്ബിഷപ് ഡോ. ജോസഫ് കളത്തിപ്പറമ്പില്‍, കോട്ടപ്പുറം ബിഷപ് ഡോ. അംബ്രോസ് പുത്തന്‍വീട്ടില്‍, മുനമ്പം പള്ളി വികാരി ഫാ. ആന്‍റണി സേവ്യര്‍ തറയില്‍, മുനമ്പം സമരസമിതി ചെയര്‍മാന്‍ ജോസഫ് സെബാസ്റ്റ്യന്‍, കണ്‍വീനര്‍ ബെന്നി ജോസഫ്, എസ്എന്‍ഡിപി യോഗം ശാഖാ പ്രസിഡന്‍റ് കെ.എന്‍. മുരുകന്‍, പ്രദേശവാസിയായ പി.ജെ ജോസഫ് എന്നിവരും ചര്‍ച്ചയില്‍ പങ്കെടുത്തു. ചര്‍ച്ച 40 മിനിറ്റ് നീണ്ടുനിന്നു.