മുനന്പം: ഭൂമിക്ക് നിയമ പരിരക്ഷ ഉറപ്പാക്കണമെന്ന് ഭൂസംരക്ഷണ സമിതി
Sunday, November 24, 2024 1:23 AM IST
സിജോ പൈനാടത്ത്
കൊച്ചി: മുനമ്പത്തെ ജനങ്ങളുടെ ഭൂമിക്ക് നിയമപരമായ പരിരക്ഷ എങ്ങനെ ലഭ്യമാക്കാന്‍ കഴിയുമെന്നതാകണം ജുഡീഷല്‍ കമ്മീഷന്‍റെ പരിശോധനാവിഷയമാകേണ്ടതെന്ന് മുനമ്പം ഭൂസംരക്ഷണ സമിതി മുഖ്യമന്ത്രിയുമായുള്ള ഓണ്‍ലൈന്‍ ചര്‍ച്ചയില്‍ ആവശ്യപ്പെട്ടു.
1950 ലെ മൂലാധാരം പരിശോധിച്ച് 35 വര്‍ഷമായി ക്രയവിക്രയ സ്വാതന്ത്ര്യത്തോടെ റവന്യു അവകാശങ്ങള്‍ അനുഭവിച്ചുവരുന്ന താമസക്കാരുടെ സ്വത്തുക്കള്‍ വഖഫ് ബോര്‍ഡിന്‍റെ ആസ്തിവിവര കണക്കില്‍നിന്നും എടുത്തുമാറ്റിക്കൊണ്ടാണ് ജനങ്ങള്‍ക്ക് ഭൂമിയിലുള്ള നിയമപരിരക്ഷ ഉറപ്പാക്കേണ്ടത്. ഇക്കാര്യം ഒരു മാസത്തിനുള്ളില്‍ സാധിക്കുമെന്നാണു പ്രതീക്ഷ.
മുനമ്പം ഭൂപ്രശ്‌നത്തില്‍ നിയമത്തിന്‍റെ അടിസ്ഥാനത്തില്‍ താമസക്കാരുടെ ആധാരങ്ങള്‍ പരിശോധിച്ച് സമാധാനപരമായി അവരെ കുടിയിറക്കുമെന്ന ജഡീഷല്‍ കമ്മീഷന്‍ ജസ്റ്റീസ് സി.എസ്. രാമചന്ദ്രന്‍നായരുടെ പരാമര്‍ശം വേദനയുളവാക്കുന്നതാണ്. ജുഡീഷല്‍ അന്വേഷണ കമ്മീഷന്‍റെ രൂപരേഖ സര്‍ക്കാര്‍ പൊതുവായി നല്‍കാത്ത ഘട്ടത്തില്‍ സ്വകാര്യവാര്‍ത്താ ചാനലിനായി നല്‍കിയ അഭിമുഖത്തില്‍ മുന്‍വിധിയോടെയാണ് അത്തരമൊരു പരാമര്‍ശം ഉണ്ടായത്
.
ഭൂപ്രശ്‌നത്തില്‍ മുഖ്യമന്ത്രിയും മന്ത്രിമാരും ഇടപെട്ടതില്‍ സമിതിക്ക് നന്ദിയുണ്ട്. പ്രദേശവാസികളുടെ റവന്യു അവകാശങ്ങള്‍ പുനഃസ്ഥാപിക്കാന്‍ സര്‍ക്കാര്‍ ഹൈക്കോടതിയെ സമീപിക്കുമെന്നു പറഞ്ഞത് സന്തോഷകരമാണ്.
മുനമ്പത്തെ സമരം നിലവിലെ രീതിയില്‍ സമാധാനപരമായി തുടരും. പള്ളിമുറ്റത്തു സമരം നടക്കുന്നതിനാല്‍ തത്പരകക്ഷികളുടെ ഇടപെടല്‍ ഒഴിവാക്കാനായി. മുഖ്യമന്ത്രിയുമായി നേരിട്ടു വിഷയങ്ങള്‍ സംസാരിക്കാന്‍ അവസരമൊരുക്കണമെന്നും പ്രതിനിധികള്‍ യോഗത്തില്‍ ആവശ്യപ്പെട്ടു. മുനമ്പം സമരം ഇന്നലെ 41 ദിവസം പിന്നിട്ടു.