ആളില്ലാ തസ്തികകളിൽ അധിക ചുമതല
Sunday, November 24, 2024 1:23 AM IST
തിരുവനന്തപുരം: വകുപ്പു തലവന്മാരില്ലാത്തതിനെ തുടർന്ന് ഒഴിഞ്ഞു കിടക്കുന്ന തസ്തികകളിൽ കൂടുതൽ ഐഎഎസ് ഉദ്യോഗസ്ഥർക്ക് അധിക ചുമതല നൽകി. ഒഴിഞ്ഞു കിടക്കുന്ന തസ്തികകളിൽ ഐഎഎസ് ഉദ്യോഗസ്ഥരെ അടിയന്തരമായി നിയമിക്കാൻ മന്ത്രിസഭ ചീഫ് സെക്രട്ടറിക്കു നൽകിയ നിർദേശത്തിന്‍റെ അടിസ്ഥാനത്തിലാണു നടപടി.
അജിത് ഭഗവത് റാവുവിന് ധനകാര്യ- വിഭവ വിഭാഗം സെക്രട്ടറിയുടെ അധിക ചമുതല നല്കി. നിലവിൽ ചരക്കു സേവന നികുതി (ജിഎസ്ടി) കമ്മീഷണറാണ് അദ്ദേഹം. അവധി കഴിഞ്ഞ് എത്തുന്ന മിർ മുഹമ്മദ് അലിയെ വ്യവസായ ഡയറക്‌ടറായി നിയമിക്കും.
അദ്ദേഹം സംസ്ഥാനത്ത് എത്തുന്നതുവരെ വ്യവസായ വകുപ്പിലെ ഓഫീസർ ഓണ്‍ സ്പെഷൽ ഡ്യൂട്ടിയായ ആനി ജൂല തോമസിനാണ് വ്യവസായ ഡയറക്ടറുടെ അധിക ചുമതല. വ്യവസായ പ്രിൻസിപ്പൽ സെക്രട്ടറി എ.പി.എം മുഹമ്മദ് ഹനീഷിന് ന്യൂനപക്ഷക്ഷേമ വകുപ്പിന്‍റെ കൂടി ചുമതല നൽകിയിരുന്നു.
സാമൂഹിക നീതി ഡയറക്ടർ ജി. പ്രിയങ്ക, കെഎസ്ടിപി പ്രോജക്ട് ഡയറക്ടർ രാഹുൽ കൃഷ്ണ ശർമ എന്നിവരെ പതിനാറാം ധനകാര്യ കമ്മീഷൻ അധ്യക്ഷന്‍റെ സംസ്ഥാന സന്ദർശനവുമായ ബന്ധപ്പെട്ട് ലെയ്സണ്‍ ഓഫീസർമാരായി നിയമിച്ചു. ഡിസംബർ എട്ടു മുതൽ 10വരെ ധനകാര്യകമ്മീഷൻ അധ്യക്ഷൻ സംസ്ഥാനത്ത് എത്തുന്നത്.