പിക്കപ് വാൻ നിയന്ത്രണംവിട്ടു മറിഞ്ഞ് ഇതരസംസ്ഥാന തൊഴിലാളി മരിച്ചു
Sunday, November 24, 2024 1:23 AM IST
കൂടരഞ്ഞി (കോഴിക്കോട്): കൂമ്പാറയിൽ പിക്കപ് വാൻ നിയന്ത്രണം വിട്ടു മറിഞ്ഞുണ്ടായ അപകടത്തില്‍ ഇതരസംസ്ഥാന തൊഴിലാളി മരിച്ചു. 15 പേര്‍ക്ക് പരിക്കേറ്റു.
പശ്ചിമബംഗാൾ സ്വദേശി സുദീപ് (20) ആണു മരിച്ചത്. ഇന്നലെ രാത്രി ഏഴോടെയായിരുന്നു അപകടം. കോൺക്രീറ്റ് പണിക്കാരുമായി കക്കാടംപൊയിൽ ഭാഗത്തുനിന്ന് കൂമ്പാറയിലേക്കു വരികയായിരുന്നു പിക്കപ് വാനാണ് ഇറക്കത്തില്‍വച്ച് അപകടത്തിൽപ്പെട്ടത്. പിക്കപ് പൂർണമായി തകർന്നു.
സമീപത്തെ വീടിന്‍റെ വിറകുപുരയിലേക്കാണ് വാഹനം മറിഞ്ഞത്. അപകടത്തിൽപ്പെട്ടവരെ ആംബുലൻസില്‍ കൂടരഞ്ഞി സെന്‍റ് ജോസഫ് , മുക്കം കെഎംസിടി എന്നീ ആശുപത്രികളിലേക്കു മാറ്റി. പലര്‍ക്കും തലയ്ക്കും കാലിനുമാണ് പരിക്കേറ്റത്. മുക്കം അഗ്‌നിരക്ഷാസേനയും നാട്ടുകാരും രക്ഷാപ്രവര്‍ത്തനത്തിനു നേതൃത്വം നല്‍കി.