കാണാതായ മൂക്കുത്തി ശ്വാസകോശത്തില്‍നിന്നു പുറത്തെടുത്തു
Saturday, November 23, 2024 1:15 AM IST
കൊച്ചി: നാലു വര്‍ഷം മുന്പ് കാണാതായ മൂക്കുത്തിയുടെ ഭാഗം 44 വയസുകാരിയുടെ ശ്വാസകോശത്തില്‍നിന്ന് പുറത്തെടുത്തു.
കൊച്ചി മുണ്ടംവേലി സ്വദേശിനിയുടെ ശ്വാസകോശത്തില്‍നിന്നാണു കാണാതായ മൂക്കുത്തിയുടെ ഭാഗം അമൃത ആശുപത്രിയിലെ ഡോക്ടർമാർ ശസ്ത്രക്രിയ കൂടാതെ പുറത്തെടുത്തത്.
വിട്ടുമാറാത്ത പനിയും ചുമയുമായി കൊച്ചിയിലെ സ്വകാര്യ ആശുപത്രിയില്‍ ചികിത്സ തേടിയപ്പോള്‍ എടുത്ത എക്‌സ്‌റേയിലാണ് മൂക്കുത്തി വലത്തെ ശ്വാസകോശത്തിന്‍റെ കീഴ്ഭാഗത്തു തറച്ച നിലയിൽ കണ്ടെത്തിയത്. തുടര്‍ന്നാണ് അമൃത ആശുപത്രിയിലെത്തിച്ചത്.
അമൃതയിലെ റസ്പിറേറ്ററി മെഡിസിന്‍ മേധാവി ഡോ.അസ്മിത മേത്തയുടെ നേതൃത്വത്തിലുള്ള സംഘം ശസ്ത്രക്രിയ കൂടാതെതന്നെ ഫൈബ്രോട്ടിക് ബ്രോങ്കോസ്കോപ്പി വഴി മൂക്കുത്തിയുടെ ഭാഗം പുറത്തെടുത്തു. രണ്ടു ദിവസത്തെ വിശ്രമത്തിനുശേഷം യുവതി ആശുപത്രി വിട്ടു.