ശ്രീധരന്‍പിള്ളയുടെ പ്രസംഗം: കേസിലെ തുടര്‍നടപടികള്‍ റദ്ദാക്കി
Friday, November 22, 2024 2:48 AM IST
കൊച്ചി: ശബരിമലയിലെ യുവതീ പ്രവേശനം സംബന്ധിച്ച വിധിയെത്തുടര്‍ന്ന് ബിജെപി സംസ്ഥാന പ്രസിഡന്‍റായിരിക്കെ പി.എസ്. ശ്രീധരന്‍പിള്ള നടത്തിയ പ്രസംഗത്തിന്‍റെ പേരിലെടുത്ത കേസിലെ തുടര്‍നടപടികള്‍ ഹൈക്കോടതി റദ്ദാക്കി.
2018 നവംബര്‍ നാലിന് കോഴിക്കോട് യുവമോര്‍ച്ച സംസ്ഥാന കൗണ്‍സില്‍ യോഗത്തിലായിരുന്നു പ്രസംഗം. ശബരിമലയില്‍ യുവതികളെത്തിയാല്‍ തന്ത്രി നട അടച്ചാല്‍ കോടതിയലക്ഷ്യമാകില്ലെന്നും ഇക്കാര്യത്തില്‍ നമ്മളെല്ലാം തന്ത്രിയോടൊപ്പം ഉണ്ടാകുമെന്നുമായിരുന്നു ശ്രീധരന്‍പിള്ള പ്രസംഗിച്ചത്.
കോഴിക്കോട് സ്വദേശി ഷൈബിന്‍ കെ. നന്മനട നല്‍കിയ പരാതിയിലാണ് കോഴിക്കോട് കസബ പോലീസ് എഫ്‌ഐആര്‍ രജിസ്റ്റര്‍ ചെയ്തത്. രാജ്യത്തിനെതിരായ കുറ്റകൃത്യത്തിന് പ്രേരിപ്പിച്ചു എന്നതടക്കമുള്ള വകുപ്പുകളാണ് ചുമത്തിയിരുന്നത്.
പ്രസംഗത്തിന്‍റെ ഒരു ഭാഗം മാത്രം കണക്കിലെടുത്താണ് കേസെടുത്തതെന്ന് ശ്രീധരന്‍പിള്ള വാദിച്ചു. ന്യായമായ വിമര്‍ശനം ക്രിമിനല്‍ കുറ്റമാകില്ലെന്നും വാദിച്ചു. അന്വേഷണം തുടരുകയാണെന്നും കേസ് റദ്ദാക്കരുതെന്നുമായിരുന്നു സര്‍ക്കാരിന്‍റെ വാദം.