സുബ്രതോ ബിശ്വാസ് ആഭ്യന്തര സെക്രട്ടറി, വി.എസ്. സെന്തിൽ മുഖ്യമന്ത്രിയുടെ സെക്രട്ടറി : Deepika.com Kerala News |

തിരുവനന്തപുരം: ആഭ്യന്തര- വിജിലൻസ് വകുപ്പ് അഡീഷണൽ ചീഫ് സെക്രട്ടറിയായി സുബ്രതോ ബിശ്വാസിനെ നിയമിക്കാൻ മന്ത്രിസഭായോഗം തീരുമാനിച്ചു. ആഭ്യന്തര അഡീഷണൽ ചീഫ് സെക്രട്ടറിയായിരുന്ന നളിനി നെറ്റോ സംസ്ഥാന ചീഫ് സെക്രട്ടറിയായ സാഹചര്യത്തിലാണു സുബ്രതോ ബിശ്വാസിന്‍റെ നിയമനം.

നളിനി നെറ്റോ വഹിച്ചിരുന്ന മുഖ്യമന്ത്രിയുടെ പ്രിൻസിപ്പൽ സെക്രട്ടറിയുടെ ചുമതല ആസൂത്രണ അഡീഷണൽ ചീഫ് സെക്രട്ടറിയായ വി.എസ്. സെന്തിലിനു നൽകി.

രണ്ടു പ്രിൻസിപ്പൽ സെക്രട്ടറിമാർക്ക് അഡീഷണൽ ചീഫ് സെക്രട്ടറിമാരായി സ്ഥാനക്കയറ്റം നൽകാനും സെക്രട്ടറി തലത്തിൽ അഴിച്ചുപണി നടത്താനും തീരുമാനിച്ചു. ഫിഷറീസ് പ്രിൻസിപ്പൽ സെക്രട്ടറി ജയിംസ് വർഗീസ്, റവന്യൂ പ്രിൻസിപ്പൽ സെക്രട്ടറി പി.എച്ച്. കുര്യൻ എന്നിവർക്കാണ് അഡീഷണൽ ചീഫ് സെക്രട്ടറിമാരായി സ്ഥാനക്കയറ്റം നൽകിയത്. 1986 ബാച്ചിൽപ്പെട്ട ഐഎഎസ് ഉദ്യോഗസ്ഥരാണ് ഇരുവരും.

ചീഫ് സെക്രട്ടറി എസ്.എം.വിജയാനന്ദ്, അഡീഷണൽ ചീഫ് സെക്രട്ടറി ഷീല തോമസ് എന്നിവർ വിരമിക്കുന്ന സാഹചര്യത്തിലാണ് സെക്രട്ടറി തലത്തിൽ അഴിച്ചു പണി വേണ്ടി വന്നത്.

ആശ തോമസാണ് പുതിയ പൊതുമരാമത്തു പ്രിൻസിപ്പൽ സെക്രട്ടറി. റോഡ്സ് ആൻഡ് ബ്രിഡ്ജ്സ് കോർപറേഷൻ മാനേജിംഗ് ഡയറക്ടർ ആയും ഇവർ തുടരും. ഫിഷറീസ് പ്രിൻസിപ്പൽ സെക്രട്ടറി ജയിംസ് വർഗീസിനു പരിസ്ഥിതി വകുപ്പിന്‍റെ അധിക ചുമതല കൂടി നൽകി.

സത്യജിത് രാജൻ പൊതുഭരണ പ്രിൻസിപ്പൽ സെക്രട്ടറിയുടെ അധിക ചുമതല വഹിക്കും. ഷീലാ തോമസ് വിരമിക്കുന്ന ഒഴിവിലാണ് ഈ നിയമനം. ഇപ്പോൾ സത്യജിത് രാജൻ ഉദ്യോഗസ്ഥ ഭരണ പരിഷ്കാര വകുപ്പിന്‍റെ പ്രിൻസിപ്പൽ സെക്രട്ടറിയാണ്.

കൊച്ചി നഗരസഭാ സെക്രട്ടറി ഹരിത വി. കുമാറിനെ പഞ്ചായത്ത് ഡയറക്ടറായി നിയമിച്ചു. ഇപ്പോൾ പഞ്ചായത്ത് ഡയറക്ടറായ ബാല കിരണിനെ ടൂറിസം ഡയറക്ടറായി നിയമിക്കാനും തീരുമാനിച്ചു.