ബൈക്ക് മതിലിൽ ഇടിച്ചുകയറി രണ്ടു യുവാക്കൾ മരിച്ചു : Deepika.com Kerala News |

ചങ്ങനാശേരി: വാഗമണിലേക്ക് ഉല്ലാസയാത്ര പോയ യുവാക്കൾ സഞ്ചരിച്ച ബൈക്ക് നിയന്ത്രണംവിട്ടു മതിലിൽ ഇടിച്ചു കയറി രണ്ടു യുവാക്കൾ മരിച്ചു. മാമ്മൂട് ലൂർദ്മാതാ പള്ളിക്കുസമീപം മുക്കത്ത് വർഗീസിന്‍റെ മകൻ ഷാരോണ്‍(22), മാമ്മൂട് വെളിയം കാവുങ്കൽപ്പടി പത്മശിവഗണവില്ലയിൽ ലാലപ്പന്‍റെ മകൻ രഞ്ജിത് ലാൽ(23) എന്നിവരാണു മരിച്ചത്. ശനിയാഴ്ച രാത്രി 11ന് വാഴൂർ റോഡിൽ മാമ്മൂടിനു സമീപമുള്ള റസ്റ്ററന്‍റിനടുത്തുള്ള വീടിന്‍റെ മതിലിൽ ബൈക്കിടിച്ചാണ് അപകടം. സംഭവം നടന്നയുടനെ റസ്റ്ററന്‍റിലെ ജീവനക്കാർ ചേർന്ന് ഇരുവരെയും ചങ്ങനാശേരി ജനറൽ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.

തൃക്കൊടിത്താനം പോലീസ് മേൽനടപടി സ്വീകരിച്ചു. കോട്ടയം മെഡിക്കൽ കോളജിൽ പോസ്റ്റ്മോർട്ടം നടത്തി മൃതദേഹങ്ങൾ ബന്ധുക്കൾക്കു വിട്ടുകൊടുത്തു. പത്തംഗസംഘം അഞ്ച് ബൈക്കുകളിലായി നേരത്തവാഗമണിലേക്കു യാത്ര തിരിച്ചിരുന്നു. ഇവർക്കൊപ്പം എത്താനായി ഇരുവരും ബൈക്കിൽ പോകുന്പോൾ ഇവരുടെ വീടിന് ഒരു കിലോമീറ്റർ മാത്രം അകലെയാണു ദുരന്തമുണ്ടായത്. അപകടത്തിൽ ബൈക്ക് ഭാഗികമായി തകർന്നു. എതിരേവന്ന കാറിൽ തട്ടി യാണ് അപകടമെന്നു ദൃക്സാക്ഷികൾ പോലീസിനു മൊഴി നൽകിയിട്ടുണ്ട്.

രഞ്ജിത് ലാലിന്‍റെ മൃതദേഹം ഇന്നലെ ഉച്ചയോടെ വീട്ടിലെത്തിച്ചു. സംസ്കാരം ഇന്നു രാവിലെ 11ന് വീട്ടുവളപ്പിൽ നടക്കും. പിതാവ് ലാലപ്പൻ തെങ്ങണയിൽ ബേക്കറി നടത്തിവരികയാണ്. മാതാവ് പരേതയായ രാധാമണി. രമ്യ ലാൽ ഏകസഹോദരിയാണ്.

ഷാരോണിന്‍റെ സംസ്കാരം പിന്നീട് മാമ്മൂട് ലൂർദ്മാതാ പള്ളിയിൽ. പിതാവ് വർഗീസ്(ബോബച്ചൻ) മിലിട്ടറി സർവീസിൽ ഉദ്യോഗസ്ഥനാണ്. മാതാവ് മറിയാമ്മ മാമ്മൂട് സെന്‍റ് സെബാസ്റ്റ്യൻസ് യുപി സ്കൂളിലെ അധ്യാപികയാണ്. സഹോദരങ്ങൾ: ഷാരോണിനൊപ്പമുള്ള ഇരട്ട സഹോദരി സപ്ന (ഇരുവരും മംഗളം എൻജിനിയറിംഗ് കോളജിൽനിന്ന് എൻജിനിയറിംഗ് പഠനം പൂർത്തിയാക്കി) ഇരട്ടസഹോദരിമാരായ ആർദ്രയും സാന്ദ്രയും ചങ്ങനാശേരി അസംപ്ഷൻ കോളജ് ബിരുദ വിദ്യാർഥിനികളാണ്.