ദീപിക സമൂഹത്തിന്‍റെ മനഃസാക്ഷി: മന്ത്രി സി. രവീന്ദ്രനാഥ് : Deepika.com Kerala News |

Click here for detailed news of all items

ദീപിക സമൂഹത്തിന്‍റെ മനഃസാക്ഷി: മന്ത്രി സി. രവീന്ദ്രനാഥ്

Saturday, February 25, 2017 3:09 PM IST

കൊച്ചി: സർവതലസ്പർശിയും മൂല്യാധിഷ്ഠിതവുമായ മാധ്യമപ്രവർത്തനത്തിലൂടെ സമൂഹത്തിന്‍റെ മനഃസാക്ഷിയായി മാറിയതിന്‍റെ മികവാണു ദീപികയെ മലയാളത്തിനു പ്രിയപ്പെട്ടതാക്കുന്നതെന്നു വിദ്യാഭ്യാസമന്ത്രി സി. രവീന്ദ്രനാഥ്. ബിസിനസ് ദീപികയുടെ ബിസിനസ് എക്സലൻസ് പുരസ്കാര സമർപ്പണ സമ്മേളനം കൊച്ചി ലുലു മാരിയറ്റ് ഹോട്ടലിൽ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം.

130 വർഷമായി കേരളത്തിന്‍റെ സമസ്തമേഖലകളിലും മഹത്തായ ആശയങ്ങൾ സംക്രമിപ്പിച്ചു സാമൂഹ്യപുരോഗതിക്കു ശ്രദ്ധേയ സംഭാവനകൾ നൽകിയാണു ദീപിക മുന്നേറുന്നത്. സമൂഹത്തെ മുന്നോട്ടു നയിക്കുകയാണ് എല്ലാ മാധ്യമങ്ങളുടെയും ധർമം. ആ അർഥത്തിൽ മലയാളത്തിൽ ദീപികയുടെ ഇടം മുമ്പിലാണ്.

ദീപികയുടെ ബിസിനസ് എക്സലൻസ് പുരസ്കാരം കേരളത്തിലെ ബിസിനസ് മേഖലയിലുള്ളവർക്കെല്ലാം പ്രചോദനമാണ്. ദീപികയുടെ സംരംഭത്തിൽ പങ്കെടുക്കാനായത് അഭിമാനകര വും സന്തോഷകരവുമാണെന്നും മന്ത്രി പറഞ്ഞു.

രാഷ്‌ട്രദീപിക ലിമിറ്റഡ് മാനേജിംഗ് ഡയറക്ടർ മോൺ. ഡോ. മാണി പുതിയിടം അധ്യക്ഷത വഹിച്ചു. ദീപിക ചീഫ് എഡിറ്റർ ഫാ. ബോബി അലക്സ് മണ്ണംപ്ലാക്കൽ ആമുഖപ്രസംഗവും ഇന്നസെന്‍റ് എംപി മുഖ്യപ്രഭാഷണവും നടത്തി. കെ.വി. തോമസ് എംപി മുഖ്യാതിഥിയായി. ഹൈബി ഈഡൻ എംഎൽഎ, ചലച്ചിത്രതാരം മിയ, രാഷ്‌ട്രദീപിക ലിമിറ്റഡ് ഡയറക്ടർ പി.പി. സണ്ണി, കെത്രിഎ കൊച്ചി സോണ്‍ സെക്രട്ടറി സന്ദീപ് നായർ എന്നിവർ പ്രസംഗിച്ചു.

ബിസിനസ് മേഖലയിൽ മികവിന്‍റെ മുദ്ര ചാർത്തിയ അഞ്ചു പേർക്കു മന്ത്രിയും രാഷ്‌ട്രദീപിക മാനേജിംഗ് ഡയറക്ടറും ചേർന്നു ബിസിനസ് ദീപിക എക്സലൻസ് അവാർഡുകൾ സമർപ്പിച്ചു.

ബിസിനസ് ദീപിക ലൈഫ് ടൈം ബിസിനസ് അച്ചീവ്മെന്‍റ് പുരസ്കാരം ശോഭ ഗ്രൂപ്പ് സ്ഥാപകനും ചെയർമാനുമായ പി.എൻ.സി. മേനോനുവേണ്ടി കന്പനി സീനിയർ വൈസ് പ്രസിഡന്‍റ് ഉണ്ണിക്കൃഷ്ണൻ ഏറ്റുവാങ്ങി.

ഗ്രാൻഡ്മാസ് ഫുഡ് പ്രൊഡക്ട്സ് മാനേജിംഗ് ഡയറക്ടർ ജിമി രാജു ഔട്ട്സ്റ്റാൻഡിംഗ് വിമൻ എൻട്രപ്രണർ പുരസ്കാരവും, പ്രിസ് ട്രേഡിംഗ് കമ്പനി മാനേജിംഗ് ഡയറക്ടർ സുനിൽ ഏബ്രഹാം ബിസിനസ് എക്സലൻസ് പുരസ്കാരവും ഏറ്റുവാങ്ങി.

ഉദയസമുദ്ര ഹോട്ടൽസ് -യുഡിഎസ് ഗ്രൂപ്പ് ചെയർമാനും മാനേജിംഗ് ഡയറക്ടറുമായ രാജശേഖരൻ നായർ എക്സലൻസ് ഇൻ ഹോസ്പിറ്റാലിറ്റി സർവീസസ് പുരസ്കാരവും സിൽക്ക് എയർ ഇന്ത്യാ ജനറൽ മാനേജർ ജഗ്ദീഷ് ഭോജ്വാനി എയർലൈൻസ് സർവീസ് ഓഫ് ദി ഇയർ പുരസ്കാരവും സ്വീകരിച്ചു.

പുരസ്കാര സമർപ്പണ ചടങ്ങുകളുടെ മുഖ്യസ്പോണ്‍സർ കൊച്ചി സാൽ കൊമേഴ്സ്യൽ പ്രൈവറ്റ് ലിമിറ്റഡ് മാനേജിംഗ് ഡയറക്ടർ എൻ.ടി. ജേക്കബ്, സ്പോണ്‍സർമാരായ ഇഡക്സ് സ്റ്റഡി എബ്രോഡ് കൊച്ചി മാനേജിംഗ് ഡയറക്ടർ ലിജോ ജോൺ, എൽസണ്‍സ് ബോംബെ ഡൈയിംഗ് കൊച്ചി മാനേജിംഗ് ഡയറക്ടർ സുനിൽ, ആഷർ ഡിജിറ്റൽ സ്റ്റോർ സിഇഒ ജോബിൻ പടിഞ്ഞാത്ത്, നടി മിയ എന്നിവർ രാഷ്‌ട്രദീപികയുടെ ഉപഹാരങ്ങൾ സ്വീകരിച്ചു. രാഷ്‌ട്രദീപിക മാർക്കറ്റിംഗ് വിഭാഗം ജനറൽ മാനേജർ കെ.സി. തോമസ് സ്വാഗതവും ദീപിക കൊച്ചി സീനിയർ മാർക്കറ്റിംഗ് മാനേജർ റെബി ജോർജ് നന്ദിയും പറഞ്ഞു. കലാവിരുന്നും ഉണ്ടായിരുന്നു. സാമൂഹ്യ, സാംസ്കാരിക, ബിസിനസ് മേഖലകളിലെ പ്രമുഖർ പുരസ്കാര സമർപ്പണ ചടങ്ങിനു സാക്ഷ്യം വഹിച്ചു.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.